پشاور ہائیکورٹ، علی امین گنڈاپور کی راہداری ضمانت میں 27 جولائی تک توسیع

پشاور(نیوز رپورٹر) پشاور ہائیکورٹ کی جسٹس مسرت ہلالی نے سابق وفاقی وزیر علی امین گنڈا پور کی راہداری ضمانت میں 27 جولائی تک توسیع کردی ۔ درخواست گزار وکیل نے عدالت کو بتایا کہ سابق وزیر کے خلاف سرگودھا میں 3ایف آئی آرز درج ہو چکی ہیں ، پہلے 16 ایف آئی آرز میں ہائیکورٹ نے انہیں راہداری ضمانت دی تھی اور وہ ا اسلام آباد سیشن کورٹ میں بھی پیش ہوئے ۔ انہوں نے عدالت سے استدعا کی ان کی راہداری ضمانت میں توسیع دی جائے ۔ عدالت نے راہداری ضمانت میں 27 جولائی تک توسیع کردی۔ واضح رہے کہ اسلام آباد آزاری مارچ میں شرکت کرنے اور توڑپھوڑ کے الزام میں علی امین گنڈا پور سمیت پی ٹی آئی کے دیگر رہنماؤں کے خلاف ایف آئی آر درج کی گئی تھی اور کئی رہنماؤں نے پشاور ہائیکورٹ سے راہداری ضمانتیں حاصل کر رکھی ہیں۔