کورونا کے وار تیز، مزید 7 جانیں نگل گیا، 732 نئے مریض ، رپورٹ

اسلام آباد (اے پی پی)کورنا کے وار میں تیزی آگئی ہے، مہلک وائرس مزید 7؍ جانیں نگل گیا، مثبت کیسز کی شرح 3.24فیصد ہوگئی، 158مریضوں کی حالت تشویش ناک ہے۔ نیشنل انسٹیٹیوٹ آف ہیلتھ (این آئی ایچ)نے کہا ہے کہ ملک بھر میں گزشتہ 24 گھنٹوں کے دوران 22 ہزار 568 کورونا ٹیسٹ کیے گئے ہیں۔ہفتہ کے روز این آئی ایچ کی جانب سے جاری ٹویٹ میں شیئر کیے گئے اعدادوشمار کے مطابق گزشتہ 24 گھنٹوں کے دوران 22 ہزار 568 کورونا ٹیسٹ کیے گئے ہیں جن میں سے 732 افراد کے کورونا ٹیسٹ مثبت آئے ہیں۔ اس طرح گزشتہ 24 گھنٹوں میں کیے گئے مثبت کورونا ٹیسٹ کی شرح 3.24 فیصد رہی ہے۔ مزید برآں اس دوران کورونا وائرس سے کورونا کے 7 مریض جاں بحق ہوئے جبکہ 158 مریضوں کی حالت تشویشناک ہے۔