صادق آباد ‘ مسلح افراد کی گھر گھس کر فائرنگ ‘ایک ہی خاندان کے 3افرادقتل

رحیم یار خان، صادق آباد ( ڈسٹرکٹ رپورٹر، نامہ نگار) صادق آباد میں 14 نامعلوم افرادکی گھر میں گھس کر فائرنگ سے ایک ہی خاندان کے 3افراد ہلاک، ایک زخمی ہو گیا، تفصیل کے مطابق چوک شہباز پور کی بستی درگڑہ میں 14 نامعلوم مسلح افراد زمیندار ملک صفدر درگھ کے گھر میں داخل ہوئے اور اندھا دھند فائرنگ کر کے ملک صفدر کے دو بیٹوں 35 سالہ محمد فرحان صفدر، 45 سالہ محمد شاہد صفدر اور پوتے 20 سالہ شہروز شاہد کو قتل کر دیا، 40 سالہ حلیم احمد گولیاں لگنے سے شدید زخمی ہو گیا، عینی شاہدین کے مطابق موٹر سائیکلوں پر آنے والے 14 مسلح افراد ڈاکو لگ رہے تھے جو واپس دریائے سندھ کے کچہ ایریا کی طرف فرار ہو گئے، یہ لرزہ خیز واقعہ کچہ آپریشن کے سلسلے میں آئی جی اور چیف سیکریٹری پنجاب کے سندھ پنجاب بارڈر ایریا کے دورے کے سات/ آٹھ گھنٹے بعد پیش آیا، وزیراعلیٰ پنجاب حمزہ شہباز نے آئی جی پنجاب راؤ سردار علیٰ خان سے صادق آباد میں نامعلوم افراد کی فائرنگ سے 3 افراد کے قتل کے واقعہ کی رپورٹ طلب کر لی، اور ہدایت کی کہ مقتولین کے لواحقین کو انصاف کی فراہمی یقینی بنائی جائے، آر پی او بہاولپور صادق علی ڈوگر نے ڈی پی او رحیم یار خان کے ہمراہ جائے وقوع کا ملاحظہ کیا ہے، ترجمان پولیس کے مطابق آر پی او بہاولپور نے ڈی پی او رحیم یار خان کے ہمراہ متاثرہ خاندان کے گھر مقتولین کے ورثا سے بھی ملاقات کی۔