ایسے معاشرے کا قیام چاہتے ہیں جہاں ریاست شہریوں کیلئے جنت ہو، زرداری

کراچی، اسلام آباد (نمائندہ جنگ، اسٹاف رپورٹر) سابق صدر مملکت اور صدر پاکستان پیپلز پارٹی پارلیمنٹیرینز آصف علی زرداری نے عید الاضحٰی کے موقع پر دنیا بھر کے مسلمانوں کو مبارکباد دیتے ہوئے کہا ہے کہ خوشی کے اس موقع پر مقبوضہ کشمیر کے مسلمانوں کو خاص طور یاد رکھا جائے جو اس وقت ظلم، جبر اور بربریت کا سامنا کر رہے ہیں، ہم ایسے معاشرہ کیلئے جدوجہد کر رہے ہیں جہاں ہر شہری کے ساتھ معاشی اور سماجی انصاف ہو اور ریاست ان کیلئے جنت ہو۔جبکہ پی پی چیئرمین بلاول بھٹو زرداری نے کہا ہے کہ عیدالاضحیٰ ہمیں یاد دلاتی ہے کہ عظیم مقاصد کی خاطر بڑے سے بڑی قربانی دینے سے گریز نہ کرنے کا عزم و حوصلہ کامیابی و کامرانی کی راہیں ہموار کرتا ہے۔ عیدالاضحی پر ایک پیغامات میں آصف علی زرداری نے کہا تمام مسلمان اپنی دعاؤں میں مقبوضہ کشمیر کے مسلمانوں کی آزادی کی دعا بھی شامل کریں۔ آصف علی زرداری نے کشمیریوں کو اس وقت سفارتی مدد کی سخت ضرورت ہے دنیا بھر میں آباد مسلمان بھائی اور بہنیں اپنے مظلوم کشمیریوں بھائیوں کی حمایت میں آواز بلند کریں۔ آصف علی زرداری نے کہا آج کا دن محبت اور قربانی کا درس دیتا ہے آج عید کی خوشیوں میں غریبوں اور بے سہارا بھائیوں بہنوں کی مدد کرکے انہیں بھی عید کی خوشیوں میں شریک کیا جائے۔ سابق صدر نے کہا کہ ہم سب کو مل کر ان عناصر کی حوصلہ شکنی کرنی ہوگی جو مذہب کی آڑ میں عوام کو گمراہ کرنے کی کوشش کر رہے ہیں۔ آصف علی زرداری نے کہا کہ پیپلزپارٹی نے ہمیشہ سیاسی، سماجی ناانصافیوں کیخلاف آواز بلند کی ہے۔علاوہ ازیں پاکستان پیپلز پارٹی کے چیئرمین اور وزیرخارجہ بلاول بھٹو زرداری نے پاکستان سمیت پوری دنیا کے مسلمانوں کو عیدالضحیٰ کی مبارکباد دیتے ہوئے کہا ہے کہ خوشیوں کا یہ تہوار امت مسلمہ کو ایک لڑی میں پروتا ہے کہ افریقہ سے لیکر برصغیر تک سب مسلمان ایک ہیں اور جب ہم متحد ہوکر کسی مقصد کے حصول کی کوشش کرینگے تو اسلامی ممالک سے بڑھ کر دنیا میں کوئی طاقت نہیں ہوسکتی۔