قوم کرپٹ حکومت کی تباہ کاریوں کی بھاری قیمت ادا کر رہی ،پرویزالٰہی

لاہور(نمائندہ خصوصی) سپیکر پنجاب اسمبلی پرویزالٰہی اور سابق وفاقی وزیر مونس الٰہی نےکہاہےکہ قوم کرپٹ حکومت کی تباہ کاریوں کی بھاری قیمت ادا کر رہی ہے، امپورٹڈ حکومت نے پاکستان کو جتنا نقصان پہنچایا اتنا تو کورونا بھی نہ پہنچا سکا، اس نازک صورتحال میں ملک کی آزادی کے تحفظ اور معیشت کو سنبھالنے کیلئے پاک فوج اور انتظامی ادارے پیش پیش ہیں۔ عیدالاضحی پر تہنیتی پیغامات میں کہا ہے کہ آج عید مناتے ہوئے ہمیں چاہئے کہ اپنے مادرِوطن کیلئے عظیم قربانیاں دینے والے پاک فوج، پولیس اور دیگر اداروں کے جوانوں، افسروں اور کشمیری بھائیوں کو اپنی دعاؤں میں یاد رکھیں اور غریبوں، مسکینوں، بیواؤں اور یتیموں کو بھی عید کی خوشیوں میں شامل کریں۔ انہوں نے کہا کہ مقبوضہ کشمیر میں نوجوانوں کا خون ایک روز ضرور رنگ لائے گا، خطے میں امن و امان اور ترقی کشمیر کی آزادی سے منسوب ہے۔ سابق وفاقی وزیر مونس الٰہی نے کہا کہ کشمیر اور فلسطین کا مسئلہ او آئی سی اقوام متحدہ کی قراردادوں کے مطابق حل کیا جانا چاہئے، بھارت ہٹ دھرمی چھوڑے اور مقبوضہ کشمیر میں اپنی ظالمانہ حرکات بند کرے کیونکہ بھارتی ظلم و ستم سے نجات حاصل کیے بغیر خطے میں امن قائم نہیں ہو سکتا، مودی سرکار مقبوضہ کشمیر میں خون بہاتے تھک جائے گی مگر پاکستان اور کشمیری اپنے مطالبے سے کبھی پیچھے نہیں ہٹیں گے۔