پنجاب میں تحریک انصاف کی دوبارہ حکومت عمران خان کے بیانیہ کی فتح ہے،پرویز الٰہی

لاہور(صباح نیوز)وزیراعلیٰ پنجاب چوہدری پرویز الٰہی نے کہا ہے کہ پنجاب میں تحریک انصاف کی دوبارہ حکومت عمران خان کے بیانیہ کی فتح ہے۔وزیراعلیٰ پنجاب سے سابق سپیکر قومی اسمبلی اسد قیصر نے ایوان وزیر اعلیٰ میں ملاقات کی، ایوب آفریدی بھی اس موقع پر موجود تھے۔ ملاقات میں باہمی دلچسپی کے امور اور سیاسی صورتحال پر تبادلہ خیال کیا گیا۔ اسد قیصر اور ایوب آفریدی نے چو ہدری پرویزالٰہی کو وزارت اعلیٰ کا منصب سنبھالنے پر مبارکباد دی۔اس موقع پر چوہدری پرویز الٰہی نے کہا کہ عمران خان کا بیانیہ وطن کی محبت اور اداروں کی بالادستی پر مبنی ہے، عمران خان نے ہر پاکستانی کو آزاد قوم کا شعور دیا۔ انہوں نے کہا کہ پنجاب میں ایک بار پھر تحریک انصاف کی حکومت عوام کو ڈیلیور کرے گی۔ صحت کارڈ، احساس پروگرام اور دیگر عوامی منصوبے تیزی سے آگے بڑھیں گے ۔ اسد قیصر نے کہا کہ آپ کی بہترین گورننس سے عوام کے مسائل حل ہونگے۔وزیراعلیٰ پنجاب چوہدری پرویز الہٰی کو ایوان وزیراعلیٰ پہنچنے پر گارڈ آف آنر پیش کیا گیا ۔وزیر اعلیٰ کا وزیر اعلیٰ ہائوس پہنچنے پرشاندار استقبال کیا گیا۔