عمران کی فاشسٹ سوچ کے باعث ملک میں تقسیم و نفرت بڑھ گئی، شیری رحمٰن

29 جولائی ، 2022

اسلام آباد (این این آئی)نائب صدر پیپلز پارٹی سینیٹر شیری رحمٰن نے کہاہے کہ عمران خان کی فاشسٹ سوچ کی وجہ سے پہلے ہی ملک میں تقسیم اور نفرت بڑھ گئی ہے۔ اپنے بیان میں انہوں نے کہاکہ عمران کہتے ہیں وہ طالبان سے مذاکرات کر سکتے ہیں تاہم سیاسی مخالفین کے ساتھ نہیں،چیئرمین پی ٹی آئی ایک ایسے انا پرست شخص ہیں جو کشمیر کے معاملے پر بھی سیاسی مخالفین کے ساتھ نہیں بیٹھے، عمران کے وزیر انتخابی فریم ورک پر مذاکرات کی باتیں کر رہے جبکہ وہ خود ابھی تک کنٹینر پر کھڑے ہیں، لوگ سیاسی بحران کے خاتمے کے خواہاں ہیں لیکن عمران اپنے مطالبات منوانے کیلئے انتشار کی دھمکیاں دے رہے۔شیری رحمٰن نے کہاکہ چیئرمین پی ٹی آئی صرف اپنے مقاصد کیلیے انتشار چاہتے ہیں، چاہے اس کا ملک پر جو بھی اثر ہو، انہوں نے کہاکہ عمران کرسی پر بیٹھ کر ہمارے جلد انتخابات کے مطالبے کی مخالفت کرتے تھے، اب حکومت سے نکلنے کے بعد انتخابات کا مطالبہ کر رہے ہیں، عام انتخابات عمران خان اور انکی ایک جماعت کے مطالبے پر نہیں ہونگے، انتخابات وفاقی حکومت اور الیکشن کمیشن کی مرضی کے مطابق اور وقت پر ہونگے۔