بلوچستان سمیت آفت زدہ علاقوں کو فوری امداد فراہم کر رہے ہیں ، چین

بیجنگ (آئی این پی) چینی وزارت خارجہ کے ترجمان ژاؤ لیجیان نے کہا ہے کہ چین پاکستان کی مقامی سماجی ترقی اور روزگارمیں بہتری کیلیے ہر ممکن مدد فراہم کرنے کو تیار ہے، اچھے دوست کے طور پر چین نے پاکستان کے آفت زدہ علاقوں کو فوری طور پر ضرورت کے مطابق امداد فراہم کی ہے ،ہمیں یقین ہے کہ پاکستانی حکومت اور عوام جلد از جلد اس تباہی سے نکلیں گے۔ ژاؤ لیجیان نے پریس کانفرنس میں کہا میں نے نوٹ کیا ہے کہ پاکستان کے صوبہ بلوچستان میں مون سون کی وجہ سے ہونے والی موسلا دھار بارشوں کے باعث آنے والے سیلاب سے تباہی ہوئی ہے ۔ انہوں نے کہا پاکستان کے اچھے دوست کے طور پر چین نے آفت زدہ علاقوں کو فوری طور پر ضرورت کے مطابق فوڈ پیکجز، بجلی پیدا کرنے کے چھوٹے آلات اور دیگر انسانی امداد فراہم کی ہے تاکہ مقامی لوگوں کو مشکلات پر قابو پانے میں مدد ملے۔ ترجمان نے کہا ہمیں یقین ہے کہ پاکستانی حکومت اور عوام جلد از جلد اس تباہی سے نکلیں گے اوراز سرنو بحالی کریں گے۔ بلوچستان کے ضلع قلعہ سیف اللہ میں عارضی کیمپوں میں مقیم خاندانوں میں تقریباً 800 سے 1000 فوڈ پیک تقسیم کیے گئے۔ تقریباً 300 سولر پینلز بھی فراہم کیے گئے کیونکہ حالیہ بارشوں نے کئی علاقوں میں بجلی کی تاریں تباہ کر دی ہیں، جس سے لوگ کئی دنوں تک بجلی سے محروم رہے۔