کسی بھی جارحیت کا بھرپور جواب دینے کیلئے ہمہ وقت تیار ہیں،نیول چیف

اسلام آ باد (آئی این پی ) اک بحریہ کے سربراہ ایڈمرل امجد خان نیازی نے کہا ہے کہ کسی بھی جارحیت کا بھرپور جواب دینے کیلئے ہمہ وقت تیار ہیں۔ترجمان پاک بحریہ کے مطابق نیول ہیڈکوارٹرز اسلام آباد میں پاک بحریہ کی کمانڈ ینڈ سٹاف کانفرنس کا انعقاد کیا گیا، پاک بحریہ کے سربراہ ایڈمرل امجد خان نیازی نے کانفرنس کی صدارت کی۔ ترجمان کا کہنا تھا کہ کانفرنس کے دوران خطے کی میری ٹائم سیکورٹی صورتحال، پاک بحریہ کی آپریشنل تیاریوں اور جوانوں کے تربیتی اور فلاحی امور کا جائزہ لیا گیا۔ ترجمان کا کہنا تھا کہ نیول چیف کو پاک بحریہ کے جاری اور مستقبل کے منصوبوں پر بریفنگ دی گئی۔ ترجمان کے مطابق اس موقع پر امیرالبحر نے جدید ٹیکنالوجی کے حصول کے ذریعے پاک بحریہ کی صلاحیتوں میں اضافے کے اقدامات اور آپریشنل تیاریوں کو سراہا۔ ترجمان نے بتایا کہ کانفرنس میں اس بات کا اعادہ کیا گیا کہ پاک بحریہ کسی بھی قسم کی جارحیت کا بھرپور جواب دینے کیلے ہمہ وقت تیار ہے۔ کانفرنس کے دوران نیول چیف نے سیلاب اور بارشوں سے متاثرہ علاقوں میں جاری امدادی سرگرمیوں میں سول انتظامیہ کی معاونت اور متاثرہ عوام کو ہر ممکن امداد کی فراہمی کیلئے فیلڈ کمانڈز کو خصوصی ہدایات بھی دیں۔