اوستہ محمد، علاقے میں سیلابی صورتحال ،انتظامیہ کی طرف سے الر ٹ جاری

اوستہ محمد(نامہ نگار) مون سون کے یکے بعد دیگرے سپل آنے سے علاقے میں سیلابی صورت حال، دریائے مولہ کے سیلابی ریلے نے جھل مگسی میں تباہی مچا نے کے بعد بچاؤ بند اور رکاوٹوں کو روندتا ہوا سیلابی ریلہ کھیر تھر کینال کے بیرونی پشتے سے ٹکرا گیا جعفر آباد انتظامیہ نے الرٹ جاری کر دیا ڈپٹی کمشنر جعفر آباد رزاق خان خجک نے باغ ھیڈ کے مقام پر سیلابی صورت حال کا جائزہ لیا انہوں نے اریگیشن حکام کو بچاؤ بند کے کمزور پشتوں کو مضبوط کرنے کے علاوہ فلڈ پروٹیکشن بند سمیت سیم نالے اور کھیر تھر کینال کے حفاظتی پشتوں کی نگرانی کے لئے مانیٹرنگ کو فعال کرنے کی ہدایت کی مون سون کی حالیہ طوفانی بارشوں کے سبب گنداخہ کے متعدد دیہات پانی میں ڈوبے ہوئے ہیں جبکہ گنداخہ شہر چاروں طرف سے گھیرا ہوا ہے آر بی او ڈی ڈرین کے اوور فلو ہونے سے گنداخہ گوٹھ غلام محمد اور نشیبی دیہات کو خطرہ ہے تاہم انتظامیہ کے اقدامات کے نتیجے میں صورت حال فی الوقت کنٹرول میں بتائی جا رہی ہے ایکسی این اریگیشن جھل مگسی محمد یار مگسی نے جنگ کو بتایا سیلابی ریلوں سے کئی دیہات زیر آب آگئے ہیں سیکڑوں مویشی اور لوگوں کی قیمتی املاک کو شدید نقصان پہنچا ہے انہوں نے کہا سیلاب سے اریگیشن کے انفرا اسٹرکچر اور سڑکوں کو ناقابل تلافی نقصان پہنچا ہے متعدد رابطہ سڑکیں سیلابی ریلے کی نذر ہو گئی ہیں انہوں نے بتایا کہ موسلا دھار بارشوں کے اسپل آنے سے ندی نالوں میں شدید طغیانی کے سبب لاکھوں کیوسک پانی کا ریلہ فلڈ روٹ سے باہر نکل کر تباہی کا سبب بن رہا ہے سرکاری دفاتر اور گھروں میں پانی داخل ہو چکا ہے خریف کی فصل کو بڑے پیمانے پر نقصان پہنچا ہے پی ڈی ایم اے کی جانب سے سیلاب متاثرین کے لئے امدادی کاروائیاں جاری ہیں جبکہ پاک فوج اور ایف سی کے جوان بھی امدادی سرگرمیوں میں مصروف ہیں۔