پشین ،طوفانی بارشوں کا سلسلہ جاری ،کچے مکانات اور فصلوں کو نقصان

29 جولائی ، 2022

پشین (نامہ نگار) شہر اور نواحی علاقوں میں طوفانی بارشوں کا سلسلہ جاری ہے، مختلف علاقوں میں سیلابی ریلے اور ندی نالوں میں طغیانی کے باعث نشیبی علاقے زیرآب آگئے، سیلابی گزرگاہوں کی بندش سے پانی کے شدید بہاؤ اور ندی نالوں میں طغیانی سے متعدد دیہاتوں میں درجنوں کچے مکانات اور فصلوں کو شدید نقصان پہنچاہے تفصیلات کے مطابق پشین شہر اور ملحقہ علاقوں تراٹہ، بازار کہنہ، لمڑان، محمودآباد، کلی سنگر، غریب آباد، یارو، منزکی، ملکیار، منزری، حرمزئی، سرانان اور بوستان میں شدید تیز ہواؤں کے ساتھ موسلادھار بارشوں کا سلسلہ جاری ہے نشیبی علاقوں میں بادل برس پڑے اور گرج چمک کے ساتھ بارش اور طوفانی ہواؤں سے موسم بدل گیا دوسری جانب نشیبی علاقوں میں سیلابی گزرگاہوں کی بندش کے باعث بارش اور ندی نالوں میں طغیانی آنے سے پشین شہر سے ملحقہ تراٹہ گریڈ کالونی، بازار کہنہ، محمودآباد، غریب آباد، کلی سنگر اور یارو سمیت مختلف علاقوں میں درجنوں کچے مکانات کو شدید نقصان پہنچا ہے اور گھروں کے اندر بارش کا پانی داخل ہونے سے گھریلوں سامان، فرنیچر اور دیواروں کو سخت نقصان پہنچا ہے جبکہ کلی تورہ شاہ، ملکیار، ڈب خانزئی، منزکی، خیرآباد، منزرئی حرمزئی اور بوستان میں سیلابی ریلوں سے کھڑی فصلیں، باغات اور دیگر فصلوں کو نقصان پہنچاہے محکمہ موسمیات کے مطابق بارش اور ژالہ باری کا سلسلہ چند دنوں تک جاری رہنے کا امکان ہے جس کی وجہ سے فصلوں کو مزید نقصان پہنچے کا اندیشہ ہےکھیتوں میں پانی کھڑا ہونے اور سیلابی ریلوں سےنقصان پہنچنے کا خدشہ پیدا ہوا ہے دوسری جانب پیداوار میں کمی آ جانے سے زمینداروں کو مالی لحاظ سے کافی نقصان برداشت کرنا پڑ سکتا ہےعوامی حلقوں نے متاثرین کی بحالی کیلیے اقدامات کامطالبہ کیاہے۔