لاپتہ افراد کی فہرست میں شامل کئی افراد دہشتگری میں ملوث ہیں ، ضیاء لانگو

کوئٹہ(خ ن)صوبائی مشیر داخلہ و قبائلی امور میر ضیاء اللہ لانگو نے لاپتہ افراد اور ان کے لواحقین سے ہمدردی کا اظہار کرتے ہوئے کہا ہےکہ وہ اور ان کی حکومت آئین میں دیئے گئے انسانی حقوق کے علمبردار ہیں انہوں نےایک بیان میں کہا کہ ان کی تمام ہمدردیاں لاپتہ افراد کے ساتھ رہی ہیں اور ان کی کوششوں کے نتیجے میں سینکڑوں لاپتہ افراد کو بازیاب کرا کے ان کے خاندانوں سے ملایا گیا ہے ۔مشیر داخلہ نے مزید کہا کہ لاپتہ افراد کی بازیابی اور انصاف کو یقینی بنانے کی کوشش آئندہ بھی جاری رہے گی تاہم انہوں نے تمام سیاسی جماعتوں اور قائدین سے پر زور دیا ہے کہ دہشتگردی کے واقعات اور ان میں ملوث عناصر کی مذمت بھی کیا کریں جو اپنے ہی بھائی بہنوں پر حملوں کے ذمہ دار ہوتے ہیں۔انہوں نے کہا کہ لاپتہ افراد کی فہرست میں بہت سے ایسے افراد کے نام بھی ہے جو دہشت گردی کی سرگرمیوں میں ملوث رہے ہیں اور ان میں سے بہت سے دہشت گردی کے واقعات میں ہلاک بھی ہو چکے ہیں صوبائی مشیر نے مزید کہا کہ سکیورٹی فورسز کے اہلکار جو دہشت گردی کے خاتمے کے لئے کوشاں ہیں وہ بھی ہمارے بھائی ہیں اور سیاسی رہنماؤں کو امن قائم رکھنے کے لیے قربانی دینے والے سکیورٹی اہلکاروں کے ساتھ بھی ہمدردی اور ان پر حملےکرنے والوں کی مذمت کرنی چاہیے۔