یوکرین میں روس کیخلاف لڑنے والے شہری وطن واپسی پر ملکی سلامتی کیلئے خطرہ ہیں، آسٹرین انٹیلی جنس کا انتباہ

کراچی (نیوز ڈیسک) یورپ میں سیکورٹی اداروں کو خدشات لاحق ہوگئے ہیں کہ یوکرین میں روسی فوج کیخلاف لڑنے کیلئے جانے والے ان کے شہری واپسی پر جارحانہ رویوں کے حامل ہو چکے ہوں گے اور ان کی واپسی معاشرے کیلئے خطرہ بن سکتی ہے۔ غیر ملکی میڈیا کی رپورٹ میں بتایا گیا ہے کہ یورپی یونین کا رکن ملک آسٹریا کا کہنا ہے کہ اسے علم ہے کہ اس کے کتنے شہری یوکرین میں روس کیخلاف لڑنے کیلئے گئے ہوئے ہیں۔ اسٹیٹ سیکورٹی اینڈ انٹیلی جنس (ڈی ایس این) کے ڈائریکٹر عمر ہجاوی پرچنر کا کہنا ہے کہ یوکرین میں لڑنے والے آسٹرین شہریوں کی واپسی سے ملک کی سلامتی کو خطرہ لاحق ہو سکتا ہے۔ انہوں نے کہا کہ جو شخص بھی پرتشدد ماحول سے نکل کر پرسکون ماحول میں آتا ہے اس سے معاشرے کو خطرات لاحق ہوتے ہیں۔