حلیم عادل کی گرفتاری فاشزم،مافیاجسے خریدنہ سکے اسے مٹادیتاہے،عمران خان

اسلام آباد (نمائندہ جنگ) تحریک انصاف نے سندھ اسمبلی میں قائد حزب اختلاف حلیم عادل شیخ کی گرفتاری کی شدید مذمت کرتے ہوئے فوری رہائی کا مطالبہ کر دیا ہے۔ چیئرمین تحریک انصاف عمران خان نے حلیم عادل کی گرفتاری کو فاشزم قرار دیتے ہوئے کہا ہے کہ اس عمل سے زرداری ، شریف مافیا کی جانب سے سیاسی مخالفین کو ختم کرنے کے انداز کی واضح عکاسی ہوتی ہے ، جسے وہ خرید نہیں سکتے اس کوراستے سے ہٹا دیتے ہیں ، یہ اقدام کسی بھی جمہوریت میں قطعی طور پر ناقابل قبول ہے۔ پی ٹی آئی کے سیکرٹری جنرل اسد عمر نے کہا ہے کہ سندھ میں فسطائی حکومت کا راج ہے اور صوبائی اسمبلی کے اپوزیشن لیڈر حلیم عادل شیخ کو ایک مرتبہ پھر گرفتار کر کے بربریت کی تمام حدیں عبور کر لی گئی ہیں۔ یہ لوگ نام نہاد جمہوریت پسند ، حقیقت میں بدترین فسطائی اور ظالم ہیں۔ پارٹی کے مرکزی سینئر نائب صدر فواد چوہدری نے کہا ہے کہ امپورٹڈ حکومت کے شکست خوردہ کل پرزے سیاسی انتقام کی آگ میں جلنے لگے ہیں ، سندھ میں پیپلزپارٹی حیوانیت پر اتر آئی ہے ، سیاسی مخالفین کو انتقام کانشانہ بنانے کیلئے جمہوری اقدار کھلے عام پامال کئے جا رہے ہیں۔