بلوچستان ،سیلاب اور بارش سے مزید 4افراد جاں بحق ،تعداد 170ہوگئی ، 15ہزار 337مکانات منہدم

کوئٹہ( این این آئی) بلوچستان میں سیلاب اور بارشوں کے باعث مزید4افراد جاں بحق ، اموات کی تعداد170جبکہ اب تک بارشوں کے دوران حادثات کا شکار ہوکر75افراد زخمی ہوئے ہیں۔ پی ڈی ایم اے کی جا ری کر دہ رپورٹ کے مطابق بلو چستان میں گزشتہ 24گھنٹوں کے دوران بارش و سیلاب سے مزید 4 افراد جاں بحق ، اموات کی تعداد170 جن میں 72 مرد 43 خواتین اور 55 بچے شامل ہیں،رپورٹ کے مطابق اموات بولان، کوئٹہ، ژوب، دکی، خضدار ،کوہلو، کیچ، مستونگ، ہرنائی، قلعہ سیف اللہ ، لسبیلہ اور سبی سمیت دیگر علاقوں میں ہوئی ہے جبکہ اس دوران شدید بارش اور سیلا ب سے حادثات کا شکار ہوکر 75 افراد زخمی ہوئے ہیں جن میں 48 مرد 11 خواتین اور 16 بچے شامل ہیں، رپورٹ کے مطابق صوبے میں اب تک سیلابی صوتحال سے مجموعی طور پر 15 ہزار 337 مکانات منہدم اور جزوی نقصان پہنچا ہے اور670 کلو میٹر پرمشتمل مختلف 6 شاہرائیں شدید متاثر ہوئی ہیں، پی ڈی ایم اے کی رپورٹ کے مطابق بارشوں کے باعث مختلف مقامات پر 16 پل ٹوٹ چکے ہیں جبکہ بارشوں سے 23 ہزار 13 مال مویشی مارے گئے ہیں، رپورٹ کے مطابق سیلاب کے باعث مجموعی طور پر 1 لاکھ 98 ہزار 461 ایکڑ زمین پر کھڑی فصلیں، سولر پلیٹس، ٹیوب ویلز اور بورنگ کو نقصانات پہنچا ہے۔