دکانی بابا چوک پر دستی بم سے حملہ ایک شخص جاں بحق، 11زخمی

کوئٹہ(اسٹاف رپورٹر) جوائنٹ روڈ دوکانی بابا چوک پر جھنڈے فروخت کرنے والے پر نامعلوم موٹر سائیکل سواروں نے دستی بم پھینک دیا جس کے پھٹنے سے ایک شخص جاں بحق اور14افراد زخمی ہو گئے ۔ پولیس کے مطابق جوائنٹ روڈ دوکانی بابا چوک پر جھنڈے فروخت کرنے والوں کے اسٹال پر جمعرات کی شب شہری خریداری میں مصروف تھے کہ نامعلوم موٹر سائیکل سوار دستی بم پھینک کر فرار ہو گئے ۔ بم زور دار دھماکے سے پھٹا جس کے نتیجے میں سرکی روڈ کا رہائشی سورج خان ولد باغی خان موقع پر ہی جاں بحق جبکہ14افراد زخمی ہو گئے جن کے نام دوستم شاہ ولد محمد شاہ،سلیمان شاہ ولد محمد شاہ ،عبدالصمد ولد گل محمد،عنایت اللہ ولد فاروق،میر حاتم علی ولد حیات اللہ،محمد بلال ولد محمد ہاشمی،گوہر شاہ ولد ذاکر شاہ،مجاہد علی ولد امان اللہ،صغر علی ولد باغی،حبیب اللہ ولد ظفر،یاض احمد ولد مسعود احمد،صبور شاہ ولد فرید شاہ،فرنم داس د ولد لکشمی چند ۔ اورگل محمد ولد محمد ہاشم بتائے گئے ہیں۔ اطلاع ملنے پر پولیس اور ایف سی کی بھاری نفری نے موقع پر پہنچ کر لاش اور زخمیوں کو ہسپتال منتقل کیا ۔ ہسپتال میں ضروری کارروائی کے بعد لاش ورثا کے حوالے کر دی گئی جبکہ تین زخمیوں کی حالت تشویشناک بتائی جاتی ہے دھماکے کی اطلاع ملنے پر سول ہسپتال میں ایمرجنسی نافذ کر کے ڈاکٹرز اور عملے کو طلب کر لیا گیا ہے۔درایں اثناءوزیراعلیٰ بلوچستان میر عبدالقدوس بزنجو نے رئیسانی روڈ چوک پر ہونے والے بم دھماکے کی مزمت کرتے ہوئے دھماکے میں قیمتی جانی نقصان پر دکھ اور افسوس کا اظہار کیا ہے وزیراعلیٰ نے آئی جی پولیس کو کوئٹہ شہر میں سیکورٹی انتظامات کو مزید سخت اور موثر بنانے کی ہدایت کی ہے اور کہا ہے کہ سیکیورٹی ادارے عاشورہ محرم اور یوم آزادی کی مناسبت سے مزید مستعد متحرک اور فعال رہیں وزیراعلی نے محکمہ داخلہ اور پولیس کو ہدایت کی ہے کہ کوئٹہ شہر کے سیکورٹی پلان کو مزید جامع اور موثر بنایا جائے تاکہ دہشت گرد عناصر کو مزموم مقاصد کے حصول کےلئے امن خراب کر نے کا کوئی موقع نہیں مل سکے وزیراعلیٰ کی جانب سے ہدایت کی گئی ہے کہ سیکورٹی کے تمام ادارے امن امان برقرار رکھنے کے لیۓ بہتر کوارڈینیشن کے ساتھ کام کریں وزیراعلیٰ نے بم دھماکے کے زخمیوں کو علاج معالجہ کی بہترین سہولیات فراہم کرنے کی ہدایت بھی کی ہے ۔