پانچ سال میں پیراملٹری فورسز کے657 اہلکاروں نے خودکشی کی،بھارت کا اعتراف

نئی دہلی(کے پی آئی)بھارتی حکومت نے اعتراف کیا ہے کہ پیراملٹری سینٹرل ریزرو پولیس فورس (سی آر پی ایف) اور بارڈر سیکورٹی فورس (بی ایس ایف)سے تعلق رکھنے والے 657 اہلکاروں نے گزشتہ پانچ برس میں خودکشی کی ہے۔بھارتی وزیر مملکت برائے داخلہ نتیانند رائے نے بھارتی پارلیمنٹ کے ایوان بالا راجیہ سبھا کو بتایا کہ 2021 میں 153 ، 2020 میں 149، 2019 میں 133، 2018 میں 97 جبکہ 2017 میں 125 اہلکاروں نے خودکشی کی۔سنٹرل آرمڈ پولیس فورسز یا نیم فوجی دستوں میں سی آر پی ایف، بی ایس ایف، سی آئی ایس ایف، آئی ٹی بی پی، ایس ایس بی، آسام رائفلز اور نیشنل سیکیورٹی گارڈ شامل ہیں۔ بھارت میں ان فورسز کی مشترکہ نفری تقریبا 10 لاکھ ہے۔