نذیر چوہان و دیگر کی ضمانت منظور

لاہور(صباح نیوز) انسداد دہشت گردی عدالت لاہور نے مسلم لیگ ن کے رہنما نذیرچوہان سمیت دیگر ملزمان کی بعد ازگرفتاری ضمانت منظور کرلی۔عدالت نے ملزمان کو ایک ایک لاکھ روپے کے ضمانتی مچلکے جمع کرانے کا بھی حکم دیا۔گزشتہ روز انسداددہشت گردی عدالت کی جج عبہرگل نے ملزمان کی ضمانت کی درخواستوں پر سماعت کی۔درخواست میں عدالت کے سامنے موقف پیش کیا گیا کہ جوہر ٹائون پولیس نے بلا جواز مقدمہ میں گرفتار کر رکھا ہے۔ جھوٹے مقدمہ سے کوئی تعلق نہیں، دوران تفتیش بھی وقوعہ سے تعلق ثابت نہیں ہوا۔ درخواست گزار کے وکیل نے موقف اختیار کیا کہ پولیس تفتیش مکمل ہو چکی، جوڈیشل ریمانڈ پر جیل منتقل کیا جا چکا ہے۔نذیر چوہان نے درخواست میں موقف اپنایا کہ کیس کے فیصلے تک جیل میں بلاجواز قید رکھنا انصاف کے اصولوں کے منافی ہے۔ عدالت سے استدعا ہے کہ نذیرچوہان سمیت دیگر کو ضمانت پر رہا کرنے کا حکم دیا جائے۔