حکومتی اتحاد نہ عوام میں جانے، نہ الیکشن کرانے کے قابل ہے، شیخ رشید

اسلام آ باد (آئی این پی ) عوامی مسلم لیگ کے سر برا ہ شیخ رشید نے کہا ہے کہ حکومتی اتحاد الیکشن کروانے کے قابل نہیں۔ ٹوئٹر پر اپنے بیان میں شیخ رشید نے کہا کہ حکومتی اتحاد نہ عوام میں جانے، نہ الیکشن کرانے اور نہ مسائل حل کرنے کے قابل ہے،پارٹیوں نے عمران خان اور اسکی پارٹی کو ہدف بنایا ہوا ہے،100پریس کانفرنسوں کا عالمی ریکارڈ قائم کیا ہے۔انکا کہنا تھا کہ الیکشن کمیشن کا بھونڈا فیصلہ سپریم کورٹ میں جانے کیساتھ ہی نیست ونابود اور دفن ہو جائیگا۔ انہوں نے کہا کہ حکومتی اتحاد نے ملکی و عوامی مسائل حل کرنے کے بجائے گرفتاریوں،مقدمات،عمران خان اور اسکی پارٹی کو نااہل کرانے پر زور دیا ہوا ہے، جس سے سیاست میں مزید انتشار اور خلفشار بڑھے گا۔ شیخ رشید نے مزید کہا کہ فضل الرحمٰن اور نوازشریف بھی انتقامی سیاست کی آگ پر پیٹرول ڈال رہے ہیں جبکہ پی پی پی خاموش تماشائی بنی ہوئی ہے۔