مثالی اسلامی فلاحی ریاست قیام کیلئے امن، انسانی حقوق فراہمی یقینی بنانا ہوگا ، صدر علوی

اسلام آ باد (آئی ا ین پی ) صدر مملکت ڈاکٹر عارف علوی نے کہا ہے کہ پاکستان پولیس نے دہشت گردی کے خلاف جنگ میں ہراول دستے کا کردار ادا کیا ، فرض کی ادائیگی کے دوران پاکستان پولیس کے بے شمار جوانوں نے جام شہادت نوش کیا،پولیس کے جوان محدود وسائل کے باوجود قوم کی خدمت میں مصروف عمل رہتے ہیں۔ یومِ شہدائے پولیس کے موقع پر پیغام دیتے ہوئے صدر مملکت کا کہنا تھا کہ ملک کی داخلی سلامتی کی خاطر اپنی جانوں کا نذرانہ پیش کرنے والے پاکستان پولیس کے بہادر جوانوں اور افسران کو خراج عقیدت پیش کرتے ہیں۔ صدر مملکت نے کہا کہ پاکستان پولیس نے دہشت گردی کے خلاف جنگ میں ہراول دستے کا کردار ادا کیا ، فرض کی ادائیگی کے دوران پاکستان پولیس کے بے شمار جوانوں نے جام شہادت نوش کیا۔ انہوں نے کہا کہ آج کے دن ہم پولیس کے تمام شہدا کو سلام پیش کرتے ہیں اور اس عزم کا اظہار کرتے ہیں کہ قوم اپنے ان محسنوں کی لازوال قربانیوں کو ہمیشہ یاد رکھے گی۔ صدر کا کہنا تھا کہ پولیس کے جوان محدود وسائل اور نامساعد حالات کے باوجود قوم کی خدمت میں مصروف عمل رہتے ہیں۔ انہوں نے کہا کہ پاکستان کو مثالی اسلامی فلاحی ریاست بنانے کیلئے ہمیں ملک بھر میں امن و امان، انسانی حقوق کی فراہمی کو یقینی بنانا ہوگا۔