آج کا دن محکوم کشمیریوں کیلئے سیاہ ترین دن ہے،چوہدری یٰسین

دبئی( جنگ نیوز ) صدر پاکستان پیپلز پارٹی آزاد کشمیر چوہدری یٰسین نے کہا ہے کہ آج کا دن محکوم کشمیریوں کے لیے سیاہ ترین دن ہے،تین سال سے کشمیری دنیا کے طویل ترین لاک ڈاؤن کا شکار،نہتے عوام کا قتل عام جاری ہے،ان خیالات کا اظہار انہوں نے دبئی میں پاکستان پیپلز پارٹی کے کارکنوں اور کشمیری کمیونٹی کی جانب سے دی گئی استقبالیہ تقریب سے خطاب کرتے ہوئے کیا۔ انہوں نے کہا کہ آج تمام کشمیری خاص طور پر پاکستان پیپلز پارٹی کے رہنما وکارکنان کشمیریوں سے اظہار یکجہتی کریں۔ انہوں نے کہا کہ گزشتہ تین سال سے کشمیری دنیا کے طویل ترین لاک ڈاؤن کا شکار ہیں، مقبوضہ کشمیر کو دنیا کی سب سے بڑی جیل میں تبدیل کر دیا،جہاں محاصرے اور سرچ آپریشن کے نام پر کشمیریوں کا قتل عام جاری ہے۔ انسانی حقوق کی بدترین اور سنگین ترین خلاف ورزیاں کی جا رہی ہیں خواتین کے ساتھ زیادتی کو بھارتی فوج جنگی ہتھیار کے طور پراستعمال کر رہی ہے۔ انہوں نے اقوام متحدہ سے مطالبہ کیا کہ وہ اپنی قراردادوں پر عملدرآمد کرواتے ہوئے کشمیریوں کو حق خودارادیت دلائے۔