مودی نے مقبوضہ کشمیرکی خصوصی حیثیت ختم کرکے بھیانک کھیل کھیلا،سپیکر کشمیر اسمبلی

مظفرآباد (این این آئی)سپیکر آزاد کشمیر چوہدری انوار الحق نے کہا ہے کہ5 اگست کا دن کشمیر کی تاریخ میں تاریک ترین دن ہے جس دن 2019 ء میں مودی سرکار نے اپنے مذموم مقاصد کو سامنے رکھتے ہوئے مقبوضہ کشمیر کی خصوصی حیثیت کو ختم کرنے کیلیے دن دھاڑے بھیانک کھیل کھیلا۔ان خیالات کا اظہار انہوں نے یوم استحصال کشمیر کی مناسبت سے کیا۔اُنہوں نے کہا کہ مودی فاشسٹ حکومت نے بھارتی آئین کے آرٹیکل370و35-A کو منسوخ کرنے کا منافقانہ اقدام کیا۔جس عمل کے پیچھے مودی مکار سرکار کی جانب سے وادی کی خصوصی و متنازعہ آئینی حیثیت ختم کرنیکی مجرمانہ کوشش ہے بالفاظ دیگر اقوام متحدہ کی سلامتی کونسل کی قراردادوں کی صریحا خلاف ورزی کی گئی۔اُنہوں نے کہا کہ مقبوضہ کشمیر میں انسانی حقوق کی سنگین خلاف ورزیاں عروج پر ہیں ، وہاں جان و مال ، عزت و آبرو ہر طرح سے غیر محفوظ ہیں۔ادارہ اقوام متحدہ کا یہ فرض بنتا ہے کہ وہ اپنی قراردادوں پر من و عن عملدرآمد کو یقینی بنانے کیلیے بھارت کو مجبور کرے ۔