مانچسٹر:ویمزلو روڈ ،کیری میل پرمشتبہ افراد کا حملہ ،ایک شخص زخمی

مانچسٹر (نمائندہ جنگ) مانچسٹر کے علاقے وویمزلو روڈ ،کیری میل مین روڈ پر مشتبہ افراد نے حملہ کر کے ایک شخص کو شدید زخمی کردیا۔ 40سالہ مرد کو واقعہ کے بعد اسٹریچر پر ایمبولینس میں ہسپتال لے جایا گیا۔واقعہ کی اطلاع ملتے ہی ہنگامی خدمات کا عملہ اور ایمبولینس موقع پر پہنچ گئی۔اسپتال ذرائع نے تصدیق کی کہ زخمی کو سر پر شدید چوٹیں آئی ہیں لیکن اس کی حالت خطرہ سے باہر ہے۔ پولیس نے مانچسٹر سٹی سینٹر کی طرف جانے والی سڑک کو شمال کی طرف سے عارضی طور پر بند کر دیا، جس کے باعث ٹریفک جام ہوگیا۔ طبی عملہ نے جائے وقوعہ پر ہی زخمی کو ابتدائی طبی امداد پہنچائی ۔پولیس نے عوام سے اپیل کی ہے کہ اس واقعہ کے بارے میں اگر کسی کو معلومات ہوں تو وہ فوری پولیس کو آگاہ کرے۔جائے وقوعہ کو سیل کردیا گیا ہے اور لانگ سائیٹ سی آئی ڈی کے جاسوس تفتیش کررہے ہیں ۔