میاں چنوں‘میاں بیوی کا جھگڑا تین ماہ کی بچی کی جان لے گیا ‘والد کیخلاف مقدمہ درج

میاں چنوں (نامہ نگار ) میاں بیوی کا جھگڑا تین ماہ کی بچی کی جان لے گیا ۔ میاں چنوں کے نواحی گاؤں 48پندرہ ایل میں انتہائی افسوسناک واقعہ پیش آیا۔ملزم زوار حسین کا اپنی بیوی سے کئی روز سے جھگڑا چل رہا تھا۔لڑائی کے دوران ملزم زوار حسین نے اپنی بیوی کو دھکا دیا جس کی وجہ سے تین ماہ کی بچی رخسانہ زمین پر گری اور سر میں چوٹ لگنے سے بے ہوش ہو گئی اور ہسپتال پہنچ کر دم توڑ گئی ۔ واقعہ کے بعد ملزم فرار ہوگیا۔ ڈی ایس پی میاں چنوں ناصر علی ثاقب نے بتایا مقتولہ بچی کی والدہ کا الزام ہے کہ اُسکے شوہر نے بچی کو قتل کیا ہے۔ واقعہ کا مقدمہ بچی کے ماموں تنویر اکمل کی مدعیت میں درج کر دیا گیا ہے جبکہ ہسپتال میں مقتولہ کا پوسٹمارٹم کیا جارہا ہے۔