تقرر‘ تبادلوں پر پابندی کے احکامات نظر انداز‘این ایچ اے میں گریڈ19کا آفیسر تعینات

ملتان(سٹاف رپورٹر)نیشنل ہائی ویز اتھارٹی میں موجود بااثر افسر نےالیکشن کمیشن آف پاکستان کے تبادلے تعیناتیوں پر پابندی کے احکامات کو نہ صرف نظر انداز کردیا بلکہ ایک ریجن میں دو دو ڈائریکٹر تعینات کرکے نئے روایت بھی قائم کر ڈالی ۔ ملتان سے ایک اہم سیاسی رہنما کی ایما پر این ایچ اے سائوتھ پنجاب میں گریڈ19کا ایک نیا عہدہ پیدا کرکے شعبہ سول انجینئرنگ گریڈ18کے آفیسر کی تعیناتی کا نوٹیفکیشن جاری کردیا ہے این ایچ اے ذرائع کے مطابق مذکورہ سیاسی شخصیت نے پیپلز پارٹی کی حکومت میں بھی نیشنل ہائی ویز اتھارٹی سے ریکارڈ کام کروائے تھے۔ الیکشن کمیشن آف پاکستان کی طرف سے تبادلے تعیناتیوں پر پابندی کے باوجود نیشنل ہائی ویز اتھارٹی بورڈ کی منظوری کے بغیر ملتان ریجن میں گریڈ 19 کا ایک اور عہدہ تخلیق کرلیا گیا ہے بتایا جاتا ہے کہ شعبہ سول انجینئرنگ کے افسر کو کو ملتان،ساہیوال اور بہاولپور کی بیٹ دی گئی ہے جبکہ پہلے سے موجود ڈائریکٹر کو رحیم یار خان اور ڈیرہ غازی خان کی بیٹ دی گئی ہے این اے157کے ووٹرز، امیدواروں اور این ایچ اے ملازمین نےالیکشن کمیشن آف پاکستان سے صورتحال کا نوٹس لینے کا مطالبہ کیا ہے ۔