سندھ سے تجویز کردہ ججوں کے کردار پر سوال اٹھانا افسوسناک ہے، جسٹس سجاد

اسلام آباد(نمائندہ جنگ)سپریم کورٹ کے جج جسٹس سجاد علی شاہ نے بھی جوڈیشل کمیشن کے اجلاس کے حوالے سے چیف جسٹس کو خط لکھ دیا،خط میں سپریم کورٹ میں تقرر کے لیے نامزد سندھ ہائی کورٹ کے ججوں کے وقار پر اٹھائے گئے سوالات پر مایوسی کا اظہار کرتے ہوئے انہوں نےکہا کہ سندھ سے تجویز کردہ ججوں کے کردار پر سوال اٹھانا افسوسناک ہے، شہرت کو ناقابل تلافی نقصان پہنچا، اختیارات استعمال کرکےتلافی کے اقدامات کریں،ججوں کے حوالے سے وکلا ء کے نمائندوں کی رائے پر انحصار کرنے کی بجائے جوڈیشل کمیشن میں شامل سندھ ہائی کورٹ کے دو سابق چیف جسٹس صاحبان سے پوچھا جاناچاہیئے تھا ،انہوںنے چیف جسٹس سے اس خط کو جوڈیشل کمیشن کے اجلاس کے ریکارڈ پر لانے کی استدعا کرتے ہوئے کہا کہ وہ رواں ماہ ریٹائرڈ ہورہے ہیں، اس لیے وہ جوڈیشل کمیشن کے آئندہ اجلاس میں شرکت نہیں کرسکیں گے، اجلاس میں سندھ کے وکلا ء کی رائے پر انحصار کر کے سندھ سے تجویز کردہ ججوں کے کردار پر سوال اٹھائے گئے ، جو نہایت افسوسناک بات ہے۔