آرمی چیف نے جدید وی ٹی فور ٹینک کیلئے تعمیر شدہ ٹریننگ کمپلیکس کا افتتاح کیا

راولپنڈی (نمائندہ جنگ) آرمی چیف جنرل قمر جاوید باجوہ نے رسالپور اور نوشہرہ کا دورہ کیا اور پاک فوج میں شامل ہونے والے نئے اور جدید جنگی وی ٹی فور ٹینک کے لیے تعمیر شدہ ٹریننگ کمپلیکس کا افتتاح کیا۔آئی ایس پی آر کے مطابق سپہ سالار نے ملٹری کالج آف انجنئیرنگ ر میں یادگار شہدا پر پھولوں کی چادر چڑھائی اور فاتحہ خوانی کی، آرمی چیف کو مختلف تربیتی سہولیات کے بارے میں بریفنگ دی گئی،جنرل قمر جاوید باجوہ نے ایم سی ای میں سٹرکچرل لیب کا بھی دورہ کیا۔آرمی چیف نے بین الاقوامی پیسز مقابلے کی کور آف انجینئرز کی چیمپئن ٹیم سے بھی ملاقات کی اور کور آف انجینئرز کی پیشہ ورانہ مہارت کو بھی سراہا۔ترجمان پاک فوج کے مطابق آرمی چیف نے سکول آف آرمر اینڈ میکانائزڈ وارفیئر نوشہرہ کے دورہ بھی کیا جہاں انہیں سکول کے تربیتی پہلوؤں کے بارے میں بتایا گیا۔آرمی چیف نے مشینی جنگی تربیت کے لیے سنٹر آف ایکسی لینس کا بھی افتتاح کیا۔ جنرل قمر جاوید باجوہ نے مستقبل کے چیلنجز سے ہم آہنگی کے لیے فوجی جوانوں کی تربیت پر سکول آف آرمر اینڈ میکانائزڈ وارفیئر کی تعریف کی۔