شمالی وزیرستان،آپریشن میں دہشتگرد ہلاک، فائرنگ تبادلے میں سپاہی شہید

اسلام آباد( وقائع نگار ) سکیورٹی فورسز نے شمالی وزیرستان میں آپریشن کے دوران دہشت گرد کو ہلاک کر دیا جبکہ فائرنگ کے تبادلے میں سپاہی شہید ہوگیا۔آئی ایس پی آر کے مطابق سکیورٹی فورسز نے دہشت گردوں کی موجودگی پر شمالی وزیرستان کے علاقے میرانشاہ میں آپریشن کیا جس میں دہشت گرد مارا گیا، فورسز نے اسلحہ اور گولہ بارود بھی برآمد کرلیا، ہلاک دہشت گرد سکیورٹی فورسز کے خلاف دہشت گردی کی کارروائیوں میں ملوث تھا۔دہشت گردوں سے فائرنگ کے تبادلے میں نارووال کے 30 سالہ سپاہی عنصر علی شہید ہوگئے۔آئی ایس پی آر کا کہنا ہے کہ علاقے میں ممکنہ دہشت گردوں کو ختم کرنے کے لیے کلیئرنس آپریشن جاری ہے، فورسز ملک بھر سے دہشت گردی کی لعنت کو ختم کرنے کے لیے پُرعزم ہے، ہمارے بہادر سپاہیوں کی قربانیاں ملک میں دیرپا امن لائیں گی۔