سندھ پولیس ذمہ داریاں دیانتداری سے انجام دیتی ہے، مراد علی شاہ

05 اگست ، 2022

کراچی ( اسٹاف رپورٹر) وزیراعلیٰ سندھ سید مراد علی شاہ نے کہا ہے کہ امن کی راہ میں سندھ پولیس کے 2380؍ سے زائد جوان شہید اور ہزاروں کی تعداد میں زخمی بھی ہوئے ، سندھ پولیس کی پیشہ ورانہ مہارت اور تجربوں کو دیگر صوبوں اور قانون نافذ کرنے والے قومی ادارے بھی سراہتے ہیں، سندھ پولیس اپنی ذمہ داریاں انتہائی محنت لگن اور دیانتداری سے انجام دیتی ہے۔ ڈی جی رینجرز میجر جنرل افتخار حسین نے کہا کہ یونیفارم میں کام کرنے والوں کا شہدأ کے ساتھ جو تعلق ہوتا ہے وہ الفاظوں میں بیان نہیں کرسکتے، ہم اپنا کام عبادت سمجھ کر کرتے ہیں۔ ان خیالات کا اظہار انھوں نے پولیس کے شہدأ کی یاد میں بحریہ آڈیٹوریم کارساز میں منعقد تقریب سے خطاب کرتے ہوئے کیا۔ تقریب میں سیکرٹری داخلہ سعید مگنیجو، سابق آئی جیز ، سول سوسائٹی کے معززین کی بڑی تعداد نے شرکت کی۔ تقریب کی شروعات میں آرمی ہیلی کاپٹر کے شہداء کیلئے کچھ دیر کھڑے ہوکر خاموشی اختیار کی گئی۔