کشمیریوں کے حق خود ارادیت کیلئےہر ممکن تعاون کرینگے، شہباز شریف

اسلام آ باد ( نیوز رپورٹر،نمائند ہ خصوصی ،نامہ نگار خصوصی ) وزیر اعظم پاکستان محمد شہباز شریف نے کہا ہے کہ بھارت کے 5 اگست 2019 کو مقبوضہ جموں و کشمیر میں غیر قانونی اور یکطرفہ اقدامات، مسلسل غیر انسانی فوجی محاصرے اور کشمیری عوام کے ناقابل بیان مصائب پر بے حسی کو جاری رکھے ہوئے تین سال ہوچکے ہیں۔یوم استحصال (5 اگست 2022) پر اپنے پیغام میں انہوں نے کہا کہ بھارتی قابض افواج نے 5 اگست 2019 سے مقبوضہ جموں و کشمیر میں اضافی فوجیوں کی تعیناتی اور میڈیا پر کڑی پابندیاں لگا کر، مقبوضہ جموں و کشمیر کو کرہ ارض کی سب سے بڑی جیل میں تبدیل کر دیا ہے۔ مقبوضہ جموں و کشمیر میں انسانی حقوق کی صورت حال گزشتہ تین سالوں کے دوران سنگین طور پر ابتر ہوئی ہے۔ کشمیری عوام ابھی تک فوجی محاصرے میں ہیں، ان کی اعلی حریت قیادت بدستور قید ہے اور ان کے نوجوان بھارتی قابض افواج کی جانب سے محاصرہ اور تلاشی آپریشنز کے ذریعے اندھا دھند ماورائے عدالت قتل کا نشانہ بنے ہوئے ہیں۔ پاکستان کشمیری بھائیوں اور بہنوں کی آواز بنا رہے گا، ہم ان کے جائز حقوق کے مکمل حصول کے لیے ہر ممکن تعاون فراہم کریں گے۔چیئرمین سینیٹ محمد صادق سنجرانی نے کہا کہ بھارت نے مقبوضہ کشمیر کی خصوصی حیثیت تبدیل کر کے مقبوضہ جموں و کشمیر میں انسانی حقوق کی بد ترین پامالی کی مثال قائم کی ہے۔ بھارت نے 5 اگست2019 کو دفعہ370 ختم کر کے کشمیری تشخص کو مسخ کیا ہے جس کی وجہ سے آئینی بحران پیدا ہوا۔بھارت کا یہ غیر انسانی اقدام اقوام متحدہ کے چارٹر اور سلامتی کونسل کی قرار دادوں کی کھلی خلاف ورزی ہے۔وزیر خارجہ بلاول بھٹو زرداری نےیوم استحصال کے موقع پر اپنے پیغام میں کہا کہ تین برسوں میں ہونے والی پیش رفتوں نے یہ بات واضح کردی ہے کہ بھارت مقبوضہ کشمیر میں آبادیاتی تبدیلیوں کو آگے بڑھانے کے اپنے مذموم منصوبوں پر مسلسل عمل پیرا ہے،غیر کشمیریوں کو لاکھوں جعلی ڈومیسائل سرٹیفکیٹ جاری کئے گئے اور زمین اور جائیداد کی ملکیت سے متعلق قوانین میں ترمیم کی گئی ہے۔ انہوں نے کہا کہ یہ اقدامات اقوام متحدہ کی سلامتی کونسل کی قراردادوں اور چوتھے جنیوا کنونشن سمیت بین الاقوامی قانون کی خلاف ورزی ہے، بلاول بھٹو نے کہا پاکستان اقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق جموں و کشمیر کے تنازعہ کا پرامن حل۔