ملک وقوم کے تحفظ کیلئے جانوں کا نذرانہ پیش کرنے والے شہدا کو سلام ،حرم کی توہین کاماسٹرمائنڈ عمران خان ہے،مریم نواز

اسلام آباد( خصوصی نامہ نگار )مسلم لیگ( ن) کی مرکزی نائب صدر مریم نواز نے کہا ہے کہ پنجاب کی’’ عدالتی حکومت ‘‘پولیس اہلکاروں کو چن چن کر نشانہ بنا رہی ہے، ملک وقوم کے تحفظ کیلئے جانوں کا نذرانہ پیش کرنے والے شہدا کو میرا سلام عقیدت۔ جمعرات کومریم نواز نے سماجی رابطے کی ویب سائٹ ٹویٹر پر اپنےایک بیان میں لکھاکہ ملک و قوم کے تحفظ کی خاطر جانوں کا نذرانہ پیش کرنے والے پولیس کے شہداء، قوم کے بہادر بیٹوں کو میرا سلام عقیدت! پنجاب پولیس کے وہ اہلکار اور افسران جنہیں فرض کی ادائیگی کی پاداش میں پنجاب کی عدالتی حکومت چن چن کے نشانہ بنا رہی ہے ان کو بھی خراجِ تحسین۔یاد رہے پنجاب پولیس کے زیر اہتمام گزشتہ روز یوم شہداء پولیس منایا گیا۔ایک اورٹویٹ میں حرم کی توہین کرنے کے مرتکب پاکستانیوں کی سزا ؤں پر ردعمل دیتے ہوئےمریم نوازنے لکھا کہ ’اس سزا کا اصل مستحق عمران ہے کیونکہ وہ اس مکروہ پلاننگ کا ماسٹر مائنڈ ہے، خیر سزا سے تو اب وہ نہیں بچ سکتا۔