ضلعی انتظامیہ کی کھنہ ایسٹ کے مسائل حل کی یقین دہانی

راولپنڈی (نمائندہ جنگ) ضلعی انتظامیہ نے ایکسپریس وے سے ملحقہ کھنہ ایسٹ کے علاقے کے دیرینہ مسائل کے حل کی یقین دہانی کرا دی ۔ یہ یقین دہانی اسسٹنٹ کمشنر نیلور نے کھنہ ایسٹ کے مختلف علاقوں کے دورے کے دوران کروائی۔ قبل ازیں کھنہ ایسٹ ویلفیئر کمیٹی کے وفد نے ڈپٹی کمشنر سے ملاقات کے دوران انہیں مسائل سے آگاہ کیا تھا جس پر ڈپٹی کمشنر نے اے سی نیلور کو علاقے کا دورہ کرنے اور مسائل کا جائزہ لینے کی ہدایت کی تھی۔گزشتہ روز اے سی نیلور کے دورے کے دوران کمیٹی کے چیئر مین راجہ ذیشان نصیب، صدر راجہ اجمل اور مسلم لیگ ن کے رہنما سردار بابر نے علاقے میں تجاوزات کی بھرمار، نالوں کی بندش، سٹریٹ لائٹس کے فقدان اور پینے کے پانی قلت سمیت تمام بنیادی مسائل سے انہیں آگاہ کیا جس پر اسسٹنٹ کمشنر نے یقین دلایا کہ وہ تمام صورتحال سے ڈپٹی کمشنر کو آگاہ کریں گے اور ان مسائل کے حوالے سے تخمینہ لگا کر جلد عملی اقدامات کیے جائیں گے۔