مکالمے اور مباحث نہ ہوں تو معاشرہ جمود کا شکار ہو جائیگا‘ پالیسی ڈائیلاگ فورم

05 اگست ، 2022

اسلام آباد (خصوصی نمائندہ) مکالمے اور مباحث انسانی ترقی میں اہم کردار ادا کرتے ہیں‘ جن معاشروں میں انکی اجازت نہ ہو وہ جمود اور تنزلی کا شکار ہو جاتے ہیں۔ نوجوانوں خصوصاً خواتین کو بااختیار بنانے میں درپیش مسائل کو اُجاگر کرنے کیلئے بارانی زرعی یونیورسٹی راولپنڈی میں پالیسی ڈائیلاگ فورم کا افتتاح کیا گیا۔ اس موقع پر ایڈم ملاورمن ٹوگیو سفیر جمہوریہ انڈونیشیا، نائلہ چوہان سابق سفیر پاکستان، نبیل افضل جنرل منیجر وزارت ٹیلی کام اینڈ آئی ٹی، مرید حسین جسرا ڈپٹی سیکرٹری وزارت خزانہ سمیت عون عباس، شکیل احمد رامے، وائس چانسلر پروفیسر ڈاکٹر قمر الزمان، ڈین پروفیسر ڈاکٹر عبدالصبور، ڈاکٹر غلام حسین بابر نے خطاب کیا۔ پروفیسر ڈاکٹر قمر الزمان نے کہا کہ پالیسی ڈائیلاگ فورمز نوجوانوں کے مسائل کے حل کی کنجی ہیں۔ مہمان خصوصی ایڈم ملاورمن ٹوگیو نے کہا کہ ڈائیلاگ فورمز ممالک کے درمیان تعلقات کو فروغ دینے میں اہم کردار ادا کرتے ہیں۔ پاک انڈونیشیا گہری اور تاریخی دوستی، نوجوانوں کو درپیش مسائل کو حل کر کے اپنی معاشی اور سماجی ترقی کے حصول کو ممکن بنا سکتی ہے۔ دیگر مقررین نے کہا کہ اساتذہ کو صنعت اور اکیڈمیا کے درمیان مضبوط شراکت داری کے ساتھ نئے اقدامات اور منفرد سوچ رکھنے کیلئے طلباء کی حوصلہ افزائی کرنی چاہئے۔