صحافیوں کے حقوق پر کسی قسم کا سمجھوتہ نہیں کیا جائیگا‘ پی ایف یو جے

اسلام آباد (خصوصی نامہ نگار) پاکستان فیڈرل یونین آف جرنلسٹس کے 72 ویں یوم تاسیس کے موقع پر جمعرات کو راولپنڈی اسلام آباد یونین آف جرنلسٹس کے زیراہتمام نیشنل پریس کلب میں خصوصی تقریب کا انعقاد کیا گیا جس میں صحافیوں کی کثیر تعداد نے شرکت کی۔ تقریب سے خطاب کرتے ہوئے مقررین نے اس عزم کا اعادہ کیا کہ صحافیوں کے مسائل کے حل کیلئے مشترکہ جدوجہد جاری رہے گی۔ رواں سال جدوجہد کا سال ہوگا جس میں خاص طور پر صحافیوں کے معاشی مسائل کے حل کے لئے کوششیں کی جائیں گی۔ مقررین نے پی ایف یو جے کے بانی رہنماؤں کی۔ جدوجہد کو بھرپور انداز میں خراج تحسین پیش کیا۔ تقریب میں ملک بھر کے وفات پا جانے والے صحافیوں کے لئے فاتحہ خوانی بھی کی گئی۔ تقریب میں پی ایف یو جے کے یوم تاسیس کا کیک کاٹا گیا۔ تقریب سے خطاب کرتے ہوئے پاکستان فیڈرل یونین آف جرنلسٹس کے صدر افضل بٹ نے کہا کہ کارکن صحافیوں کے حقوق پر کسی قسم کا سمجھوتہ نہیں کیا جائے گا۔ مہنگائی کے اس دور صحافیوں کے معاشی مسائل سے آگاہ ہیں اسی لئے پی ایف یو جے نے فیصلہ کیا ہے کہ رواں سال جدوجہد کا سال ہوگا جس میں صحافیوں کے معاشی مسائل کے حل پر توجہ مرکوز رکھی جائے گی۔ انہوں نے کہا کہ پی ایف یو جے کی تاریخ جدوجہد سے بھری پڑی ہے جس طرح ہمارے قائدین نے کبھی جبر کے ساتھ سمجھوتہ نہیں ہم مشکل وقت کارکن صحافیوں کے ساتھ کھڑے رہیں گے۔ سابق سیکرٹری جنرل پی ایف یو جے ناصر زیدی نے پی ایف یو جے کی تاریخ پر تفصیلی روشنی ڈالی۔ انہوں نے کہا کہ پی ایف یو جے 1950 سے لیکر اب تک ہر جابر حکمران کے سامنے ڈٹ کر کھڑی رہی ہمارے قائدین نے آمروں کے ظلم برداشت کئے لیکن سمجھوتہ نہیں کیا۔ آمریت کے دور میں بھی صحافیوں کے جدوجہد جاری رکھی۔ پی ایف یو جے کو توڑے کی کوشش کی گئی لیکن کامیابی نہ ہوسکی۔ سابق سیکرٹری جنرل فوزیہ شاہد نے آر آئی یو جے کے کردار کو سراہتے ہوئے کہا کہ آر آئی یو جے نے ہمیشہ ہی ایف یو جے کی آواز پر لبیک کہا اور ہراول دستے کا کردار ادا کیا۔ صدر آر آئی یو جے عابد عباسی نے کہا کہ ہماری قیادت نے جس جدوجہد اور مقصد کے لئے قربانیاں دیں وہ ہمارے لئے مشعل راہ ہے۔ صدر پریس کلب انور رضا نے کہا کہ ہم پی ایف یو جے کے بانی رہنماؤں کو خراجِ تحسین پیش کرتے ہیں۔ جنرل سیکرٹری آر آئی یو جے طارق علی ورک نے کہا کہ ہم پی ایف یو جے کے قائدین کی جدوجہد کو اسی جذبے کے ساتھ جاری رکھیں گے۔