وزیر خزانہ سے ایشیائی ترقیاتی بینک کے وفد کی ملاقات

اسلام آباد (اے پی پی) وفاقی وزیر خزانہ مفتاح اسماعیل نے کہاہے کہ حکومت پائیداراورجامع اقتصادی نموکیلئے موثرڈھانچہ جاتی اصلاحات پربھرپورتوجہ دے رہی ہے۔ انہوں نے یہ بات پاکستان میں ایشیائی ترقیاتی بینک (اے ڈی بی)کی سابق کنٹری ڈائریکٹرژیاوہونگ ینگ کی قیادت میں وفد سے ملاقات میں گفتگوکرتے ہوئے کہی۔انہوں نے وفدکاخیرمقدم کیا اورپاکستان میں مختلف شعبوں میں اصلاحاتی ایجنڈا پرعمل درآمدمیں بینک کے کردار کا اعتراف کیا۔انہوں نے وفد کوموجودہ حکومت کی ترجیحات سے آگاہ کیا اورکہاکہ حکومت پائیداراورجامع اقتصادی نموکیلئے موثرڈھانچہ جاتی اصلاحات پربھرپورتوجہ دے رہی ہے۔انہوں نے پاکستان میں مختلف شعبوں میں معاونت فراہم کرنے پر اے ڈی بی کے وفد کاشکریہ اداکیا ۔ انہوں نے بینک کی معاونت سے جاری منصوبوں کی جلدتکمیل میں مکمل تعاون کا یقین دلایا۔ اے ڈی بی کے وفد نے پاکستان میں توانائی سمیت مختلف شعبوں میں بینک کی معاونت سے جاری منصوبوں پرپیش رفت سے وزیرخزانہ کوآگاہ کیا اور بتایا کہ بینک نے پاکستان کیلئے کنٹری پارٹنرشپ حکمت عملی مرتب کی ہے جوحکومت پاکستان کی ترجیحات کے عین مطابق ہے۔اس موقع پرپاکستان میں ایشیائی ترقیاتی بینک کے کنٹری ڈائریکٹر یانگ یی اوردیگرسینئرآفسران بھی موجود تھے۔