سٹاک مارکیٹ میں تیزی بر قرار، انڈیکس 357پوائنٹ بڑھ گیا

لاہور (سودی)سٹاک مارکیٹ میں جاری تیزی کا رجحان گزشتہ روز بھی برقرار رہا۔ دو سو سے زائد کمپنیوں کے حصص کی قیمتوں میں اضافہ سمیت انڈیکس اور مجموعی مالیت بھی بڑھ گئی۔ مارکیٹ میں کاروبار کا آغاز ہی تیزی سے ہواجو آخر تک جاری تھی۔ اس دوران ایک موقع پر انڈیکس میں 562پوائنٹ کا اضافہ بھی ہوا مگر آنے والی پرافٹ ٹیکنگ کے باعث آخر میں یہ سطح برقرار نہ رہ سکی۔ مارکیٹ میں تیزی کی وجہ ایک روز قبل کی بہتری کا تسلسل سمیت ڈالر کے مقابلہ میں روپے کی قدر میں مزید اضافہ ہونا، صنعتی اداروں کو خام مال کی درآمد کیلئے، بینکوں سے ایل سی کی دستیابی، آئی ایم ایف سے رواں ماہ قسط ملنے کی یقین دہانی، عالمی منڈی میں پاکستان بانڈز کی قدر میں بہتری، ٹی بلز پر شرح مارک اپ میں کمی کے بعد ملکی معاشی حالات میں بہتری کے آثار پیدا ہونا سمیت عالمی منڈی میں تیل کی قیمتیں گرنا اور چین کی طرف سے قرضہ کی وصولی موخر کرنا شامل تھے۔ گزشتہ روز بینکوں اور بیرونی فنڈز کی نیٹ سیل تھی جبکہ نجی سرمایہ کاروں اور میوچل فنڈز نے نیٹ خریداری کی۔ کاروبار کے اختتام پر مارکیٹ انڈیکس 357پوائنٹ کے اضافہ سے 41425پر آ گیا۔ 212کمپنیوں میں اضافہ، 107میں کمی اور 24میں استحکام رہا۔ 27کروڑ 54لاکھ حصص کا کاروبار ہوا۔