ایران ، افغانستان سے پیاز، ٹماٹر کے درآمدی پرمٹ فوری جاری کرنے کافیصلہ

اسلام آباد ( خصوصی نمائندہ) ایران ، افغانستان سے پیاز، ٹماٹر کے درآمدی پرمٹ فوری جاری کرنے کافیصلہ کرلیا گیا ہے ، ملک میں ٹماٹر اور پیاز کی دستیابی کا جائزہ لینے کیلئے وزیر تجارت نوید قمر کی زیر صدارت اجلاس ہوا،اجلاس کوبتایا گیا کہ آئندہ تین ماہ میں ملک کو ٹماٹر اور پیاز کی قلت کا سامنا کرنا پڑیگا، حالیہ سیلاب نے فصلوں کو بہت زیادہ نقصان پہنچایا ہے جس کے نتیجے میں ان اشیاء کی قیمتوں میں اضافہ اور قلت متوقع ہے،اجلاس میں شرکاء نے اس بات پر اتفاق کیا کہ ٹماٹر اور پیاز کی درآمد سے اشیاء کی قیمتوں میں استحکام اور مارکیٹ میں دستیابی کو یقینی بنانے میں مدد ملے گی، پیاز اور ٹماٹر کی درآمد کو مزید آسان بنانے کیلئے وزارت تجارت، وزارت قومی غذائی تحفظ اور تحقیق اور ایف بی آر ملکر کام کرینگے اور مارکیٹ میں اشیاء کی فراہمی کو یقینی بنانے کیلئےروزانہ صورتحال کی نگرانی کرینگےاور ازالے کیلئے ضروری کارروائی بھی کرینگے،اجلاس میں فیصلہ کیا گیا کہ وزارت قومی غذائی تحفظ و تحقیق پیاز اور ٹماٹر کے درآمدی پرمٹ 24 گھنٹوں میں جاری کریگی، وزارت نے ایف بی آر کو پیاز اور ٹماٹر کی درآمد پر ٹیکس اور لیویز اگلے 90 دنوں کیلئے معاف کرنے کی تجویز بھی دی ہے،وزارت قومی خوراک اور تحفظ نے محکمہ پلانٹ پروٹیکشن کو ہدایت کی ہے کہ وہ درآمد میں سہولت فراہم کریں اور اس بات کو یقینی بنائیں کہ درآمد کنندگان کیلئے کوئی رکاوٹ نہ ہو ۔