فلور ملز ایسوسی ایشن کا سیلاب زدگان کیلئے 10 کروڑ روپے دینے کا اعلان

اسلام آباد (تجزیاتی رپورٹ، حنیف خالد) پاکستان فلور ملز ایسوسی ایشن نے سیلاب زدگان خاندانوں کیلئے فوری طور پر دس کروڑ روپے کی مدد کا اعلان کیا ہے۔ 30 اگست کو پاکستان فلور ملز ایسوسی ایشن پنجاب برانچ کا ہنگامی اجلاس ایسوسی ایشن کے سرپرست اعلیٰ عاصم رضا احمد کی صدارت میں ہوا جس میں پنجاب کے 1080 فلور ملوں کے نمائندوں نے شرکت کی۔ اور سیلاب زدگان کو ہر ممکن امداد دینے کا فیصلہ کیا۔ فوری طور پر ہر فلور مل کیلئے یہ لازمی قرار دیا گیا ہے کہ وہ اپنی فلور مل کی پیداواری صلاحیت (رولر باڈی) پر دس ہزار روپے سیلاب زدگان کیلئے لازماً دینگے پنجاب کی 1080 فلور ملوں میں 9800 رولر باڈیز ہیں اس طرح دس ہزار روپے فی رولر باڈی کے ریٹ سے نو کروڑ اسی لاکھ روپے موقع پر اکٹھے کر لئے گئے اس کے علاوہ پاکستان فلور ملز ایسوسی ایشن کے پنجاب برانچ کے چیئرمین طاہر علی ملک اور یکم اکتوبر سے چیئرمین پاکستان فلور ملز ایسوسی ایشن کا عہدہ سنبھالنے والے چوہدری افتخار احمد مٹو ایسوسی ایشن کے تمام ایگزیکٹو ارکان اور عہدیداران نے دس ہزار روپے فی رولر باڈی کے علاوہ مزید ایک کروڑ 44 لاکھ روپے پاکستان کی تاریخ کے بدترین سیلاب سے تباہ حال بہن بھائیوں کیلئے جمع کئے گئے اور یہ فیصلہ بھی ہوا کہ پاکستان فلور ملز ایسوسی ایشن متفقہ طور پر قدرتی آفت کا شکار متاثرین کی مدد مذہبی قومی اور اخلاقی فریضہ کے طور پر جاری رکھے گی متاثرین کو مفت آٹا مہیا کریگی۔ جب تک سیلاب زدگان اپنے پائوں پر کھڑے نہیں ہو جاتے پاکستان فلور ملز ایسوسی ایشن پنجاب برانچ ان کو آٹے نقدی کی شکل میں امداد جاری رکھے گی۔