PTIکا لانگ مارچ سے قبل حکومتی اتحادیوں سے ملاقاتوں کا فیصلہ

اسلام آباد(این این آئی) تحریک انصاف نے لانگ مارچ سے پہلے حکومتی اتحادیوں سے ملاقاتوں کا فیصلہ کیا ہے جس میں اتحادیوں کوحکومت چھوڑنے پر قائل کرنے کی کوشش کی جائے گی۔ اتحادیوں سے ملاقاتوں کیلئے تحریک انصاف کے چیئرمین عمران خان نے پرویزخٹک کی سربراہی میں چار رکنی کمیٹی تشکیل دے رکھی ہے، ٹیم کے ارکان میں اسدعمر، فواد چوہدری اوراسد قیصر شامل ہیں۔ اس حوالے سے رہنماء پی ٹی آئی نے بتایا کہ ان جماعتوں سے رابطے توپہلے ہی تھے تاہم سیلاب کی وجہ سے ملاقاتیں شروع نہ ہوسکیں لیکن اب ائندہ ہفتے سے ملاقاتوں کا سلسلہ بھی شروع کررہے ہیں۔ٹی وی رپورٹ کے مطابق پی ٹی آئی رہنماء کا کہناتھاکہ ایم کیوایم حکومت سے بہت تنگ ہے اور ان سے پی ٹی آئی رہنماء عمران اسماعیل پہلے ہی رابطے میں ہیں‘بلوچستان نیشنل پارٹی اور بلوچستان عوامی پارٹی سمیت حکومت کے دیگر اتحادیوں سے بھی ملاقاتیں کی جائیں گی جس میں ان جماعتوں کے رہنمائوں کو قائل کیا جائیگا کہ حکومت کو چھوڑ دیں ۔