حکومت ہوش کھوبیٹھی ‘ابھی سے اسلام آبادکو قلعہ بنارہی ہے‘ فواد

اسلام آباد (این این آئی)تحریک انصاف کے رہنما فواد چوہدری نے کہا ہے کہ حکومت مکمل ہوش کھو بیٹھی ہے‘ ابھی تو تحریک انصاف نے اسلام آباد بند کرنے کی کوئی کال ہی نہیں دی اوریہ ابھی سے پورا شہر قلعہ بنا رہے ہیں‘ اتنے خوفزدہ اور نالائق لوگ شاید ہی اسلام آباد نے پہلے دیکھے ہوں ، الیکشن کرا ئواور لوگوں کو فیصلہ کرنے دو۔اپنے بیان میں فواد چوہدری کا کہناتھاکہ دنیا میں پٹرول اور پام آئل کی قیمتیں کریش کر چکی ہیں‘پاکستان میں عوام پر پھر پٹرول بم گرا دیا گیا ہے۔اگریہ حکومت برقراررہی تومڈل کلاس مکمل طور پرغربت کی لکیر سے نیچے چلی جائے گی۔مہینے کے اخراجات پورے کرناناممکن ہو چکا ہے‘72رکنی کابینہ والے وزیرِ اعظم بیرونی دوروں پر ہیں۔