عمران خان دنیا کو سیلاب زدگان کی مدد سے روک رہے ہیں، عظمیٰ بخاری

کراچی (ٹی وی رپورٹ)جیو کے پروگرام ”آپس کی بات“ میں میزبان منیب فاروق سے گفتگو کرتے ہوئے ن لیگ کی رہنما عظمیٰ بخاری نے کہا ہے کہ عمران خان حکومت پر الزام لگا کر دنیا کو سیلاب زدگان کی مدد سے بھی روک رہے ہیں، سینئر صحافی اور تجزیہ کار اطہر کاظمی نے کہا کہ حکومت عمران خان سے اتنی ڈری ہوئی ہے کہ سیلاب زدگان کیلئے ٹیلی تھون نہیں کرنے دیتی، سینئر صحافی و تجزیہ کار مظہر عباس نے کہا کہ احسن اقبال کیس میں چیف جسٹس کے ریمارکس بہت اہم ہیں۔ ن لیگ کی رہنما عظمیٰ بخاری نے کہا کہ ن لیگ کے کسی رہنما نے نیبترامیم کا حوالہ دے کر کیس واپس لینے کی درخواست نہیں کی، مریم نواز کی سزا کے خلاف اپیل بھی میرٹ پر چل رہی ہے، جس شخص نے لوگوں کے سالہا سال لوگوں کو قید میں رکھوایا اس کا بھی کوئی علاج ہونا چاہئے، وزیراعظم شہباز شریف یو این اجلاس میں پارٹی کرنے نہیں گئے سیلاب زدگان کا کیس لڑرہے ہیں، شہباز شریف وہاں دنیا بھر سربراہان اور آئی ایم ایف کے لوگوں سے مل رہے ہیں،اس وقت پاکستان میں سیلاب اقوام متحدہ کا ٹاپ ایجنڈا ہے۔