آرمی چیف کی ملٹری ایڈوائزر یو این سیکرٹری جنرل سے ملاقات، اہم امور پرگفتگو

واشنگٹن ،راولپنڈی (این این آئی)چیف آف آرمی اسٹاف جنرل قمر جاوید باجوہ کے دورہ امریکہ میں یو این سیکرٹری جنرل کے ملٹری ایڈوائزر سے ملاقات کی ہے جس میں باہمی دلچسپی، علاقائی سیکورٹی اور پاکستان میں بدترین سیلاب کی تباہ کاریوں پر تبادلہ خیال کیا گیا جبکہ یواین ملٹری ایڈوائزر نے امن دستوں اور انسداد دہشت گردی کی کوششوں میں پاکستان کے کردار کی تعریف کی ۔آرمی چیف کے دورہ امریکا میں اہم ملاقاتیں متوقع ہیں، جب صحافیوں سے آرمی چیف کے دورے کے بارے میں پاکستان کے سفیر سردار مسعود خان سے معلومات مانگی تو انہوں نے کہا کہ ہاں، وہ یہاں ہیں تاہم پاکستانی سفیر نے آرمی چیف کے سفر کے پروگرام کو شیئر کرنے سے گریز کیا۔نجی ٹی وی کے مطابق جنرل قمر جاوید باجوہ سے وزیر دفاع لائیڈ آسٹن، نیشنل انٹیلی جنس کے ڈائریکٹر ایورل ڈی ہینس اور سی آئی اے کے ڈائریکٹر ولیم جے برنز کی ملاقات متوقع ہے۔ علاوہ ازیں آرمی چیف جنرل قمر جاوید باجوہ نے دورہ امریکہ کے دور ان یو این سیکرٹری جنرل کے ملٹری ایڈوائزر جنرل بیرامے ڈیوپ سے ملاقات کی جس میں باہمی دلچسپی، علاقائی سیکورٹی اور پاکستان میں بدترین سیلاب کی تباہ کاریوں پر تبادلہ خیال کیا گیا۔ آرمی چیف جنرل قمر جاوید باجوہ نے اقوام متحدہ کی اقدار کے فروغ اور تنازعات کے دوران ردعمل میں اقوام متحدہ کے فوجی مشیر کے دفتر کے کردار کو سراہا۔اقوام متحدہ کے ملٹری ایڈوائزر نے موسمیاتی تبدیلیوں کے باعث پاکستان میں سیلاب سے ہونے والی تباہی پر دکھ کا اظہار کیا اور متاثرین کے اہل خانہ سے دلی تعزیت کی۔ انہوں نے سیلاب متاثرین کو مکمل تعاون کی یقین دہانی کرائی، اقوام متحدہ کے ملٹری ایڈوائزر نے اقوام متحدہ کے امن مشن میں پاکستان کی شراکت اور انسداد دہشت گردی میں غیر معمولی کامیابیوں کا بھی اعتراف کیا۔