پی ڈی ایم نے عمران کے جھوٹے بیانیہ کوہمیشہ کیلئے دفن کردیا، حافظ حمد اللہ

پشاور(نمائندہ جنگ)جمعیت علمائے اسلام کے مرکزی رہنما اور پاکستان ڈیموکریٹک موومنٹ کے ترجمان سینیٹر حافظ حمداللہ نے کہاہے کہ پی ڈی ایم نے عمران نیازی کے جھوٹے سیاسی بیانیہ کو ہمیشہ کیلئے دفن کردیا ہے کیونکہ اس فتنہ سے ملک و قوم کو شدید خطرات لاحق ۔ہیں۔ وہ پشاور میں عالمی تحفظ ختم نبوتؐ کانفرنس سے خطاب کررہے تھے ، کانفرنس سے شیخ الحدیث مولانا عزیزالدین، مولانا سمیع اللہ جان فاروقی، الحاج عنایت گل ، حاجی جلیل جان اور دیگر علمائے کرام نے بھی خطاب کیا، حافظ حمد اللہ نے کہاکہ ٹرانس جینڈر بل قوم کی نہیں بلکہ مغرب زدہ ٹولے کی ضرورت ہے، جے یو آئی اسکا متبادل بل سینیٹ میں پیش کرچکی ہے، اس لئے قوم مطمئن رہے،اسلام اور شریعت کے منافی کسی بل کو پارلیمنٹ سے پاس ہونے کی اجازت نہیں دیں گے، انہوں نے کہاکہ ٹرانسجینڈر بل کا گیت عمران نیازی اور انکے ارد گرد جمع ٹولہ گارہی ہے کیونکہ سب سے زیادہ انہیں اسکی ضرورت ہے، انہوں نے کہا کہ عمران نیازی جھوٹوں کے سردار ہے، جھوٹ اور گالم گلوچ انکی سیاست کے بنیادی عنصر ہیں، پی ڈی ایم قیادت نے انکے جھوٹے سیاسی بیانیہ کو ہمیشہ کیلئے دفن کردیا ،انہوں نے کہا کہ وزیراعظم ہاؤس ماضی میں ملک دشمن قوتوں کا ٹھکانا رہا ہے، ہم پہلے بھی کہہ چکے ہیں کہ عمران نیازی ایک بدترین فتنہ ہے جس سے چھٹکارا حاصل نہ کیا گیا تو ملک و قوم کو اس کے خطرناک نتائج بھگتنا پڑیں گے۔