حکومت خانہ جنگی چاہتی ہے، عمران کو گرفتار کرنے کی بہت کوشش کی گئی، بابر اعوان

اسلام آباد(صباح نیوز)پاکستان تحریک انصاف کے رہنما بابر اعوان نے کہا ہے کہ حکومت خانہ جنگی چاہتی ہے، عمران کو گرفتار کرنے کی بہت کوشش کی گئی، عمران خان کی کال پر پورا پاکستان باہر نکلے گا۔عمران خان کے وکیل ڈاکٹر بابر اعوان نے اسلام آباد ہائیکورٹ کے باہر میڈیا سے گفتگو کرتے ہوئے کہا کہ ایسا لگتا ہے امپورٹڈ حکومت کو اقتدار کی کرسی نہیں بلکہ توے پر بٹھا دیا گیا ہے۔ انہوں نے کہا کہ عمران خان کی گرفتاری کیلئے پاکستان کی تاریخ بدل دی گئی، عمران خان نے وارنٹ کے بعد علاج کا بہانہ نہیں ڈھونڈا۔پی ٹی آئی رہنما نے کہا کہ عمران خان ہرجگہ سرخرو ہورہے ہیں، کل پورا پاکستان بغیر کال کے عمران خان کیلئے کھڑا ہوگیا۔بابر اعوان نے کہا کہ عدالت کو بتایا اسی کیس میں پہلے سے ضمانت لی ہوئی تھی، عمران خان کے خلاف بے بنیاد مقدمہ درج کیاگیا، ان کو گزشتہ رات سے گرفتار کرنے کی کوشش کی گئی، حکومت خانہ جنگی چاہتی ہے، ہم بھاگنے نہیں دینگے۔ انہوں نے کہا کہ عمران خان کی کال کا انتظار ہے، عمران خان کی کال پر پورا پاکستان باہر نکلے گا، پاکستان کی تاریخ اور تقدیر بدلنے جارہی ہے، عمران خان بہت جلد کال دیں گے۔ عمران خان کے وکیل نے کہا کہ عمران خان کیخلاف جتنے مقدمات بنے کسی سیاسی لیڈر کیخلاف نہیں بنے، جتنے کیسز کرنے تھے کرلیے اب کیسز کرنیکی ہماری باری ہے، ہمارے کیسز حقائق پر مبنی ہوں گے