مریم نواز کی عمران کے بارے میں رائے بالکل درست ہے، وزیراطلاعات

اسلام آباد(اے پی پی)وزیر اطلاعات ونشریات مریم اورنگزیب نے کہا ہے قرآن پاک میں اللہ تعالیٰ کا فرمان ہے کہ بہرے ہیں، گونگے ہیں، اندھے ہیں اب یہ نہیں پلٹیں گے، ایک ٹویٹ میں انہوں نے کہا کہ مریم نواز کی عمران خان کے بارے میں رائے بالکل درست ہے، بدقسمتی سے ہمیں یہ معذرت خواہانہ عذر بیان اور ایک ایسے شخص کا نام مجبوراًلینا پڑتا ہے جو خواتین کو کم تر مخلوق سمجھنے کی ذہنی بیماری میں مبتلا ہے اور ہر روز کم ظرفی کے ایک نئے پاتال میں اتر جاتا ہے، عمران خان نے ہر بار یہی ثابت کیا کہ وہ عورتوں کی توہین و تحقیرکرتا ہے، اُنکی عزت واحترام سے نابلد ہے، اُنہیں محض اشیاءسمجھ کربدکلامی ہی نہیں ہراساں بھی کرتا ہے، عمران خان نے اپنی جماعت اور حامیوں میں یہی بیمار ذہنیت پھیلائی اور ُاسکی حوصلہ افزائی کی ہے یہ نہایت مایوس کُن اور افسوسناک بات ہے کہ پی ٹی آئی کی خواتین لیڈر اور حامی اِس رویے کو درست قرار دیکر نہ صرف اس پر کاربند بلکہ جشن منارہی ہیں یہ نہایت شرمناک اور اسکی حقیقی جھلک ہے کہ عمران خان درحقیقت کس قدر چھوٹا آدمی ہے۔