سائفر، تحقیقات کیلئے سپریم کورٹ کا کمیشن بنایا جائے، فواد چوہدری

اسلام آباد (خبر نگار) پاکستان تحریک انصاف نے سائفر کی تحقیقات ایف آئی اے سے کرانے کا حکومتی فیصلہ مسترد کرتے ہوئے مطالبہ کیا ہے کہ تحقیقات سپریم کورٹ کا کمیشن کرے۔ پارٹی کے مرکزی سینئر نائب صدر فواد چوہدری نے سائفر کی تحقیقات کا خیر مقدم کرتے ہوئے کہا ہے کہ عمران خان کی حکومت ایک سازش کے تحت ہٹائی گئی ، سائفر اور بین الاقوامی سازش کی تحقیقات پہلے دن سے ہی تحریک انصاف کا مطالبہ تھا۔ انہوں نے کہا کہ انصاف کا تقاضا یہ ہے کہ یہ تحقیقات ایف آئی اے کے بجائے سپریم کورٹ کا بنایا گیا اعلیٰ سطح عدالتی کمیشن کرے تاکہ دودھ کا دودھ اور پانی کا پانی ہو سکے۔ فواد چوہدری نے کہا کہ اسی طرح آڈیو لیکس کا معاملہ بھی تحقیقات کیلئے اعلیٰ سطح عدالتی کمیشن کے سپرد کیا جانا چاہئے۔