اقوام متحدہ مسئلہ کشمیر اپی قراردادوں عوامی امنگوں کے مطابق حل کرے، بلاول، صدر سلامتی کونسل کو خط

نیو یارک(پی پی آئی) پاکستانی وزیرخارجہ بلاول بھٹوزرداری نے صدرسلامتی کونسل گیبون کو مقبوضہ کشمیرکی خطرناک صورتحال سے آگاہ کرتے ہوئے مطالبہ کیا ہے کہ اقوام متحدہ مسئلہ کشمیر اپنی قراردادوں ،عوامی امنگوں کے مطابق حل کرے۔ جب کہ پاکستانی مندوب نے کہاہے کہ مقبوضہ کشمیر پر بھارتی تسلط نوآبادیاتی نظام کا بدترین مظہر ہے۔ تفصیلات کے مطابق اقوام متحدہ میں پاکستان کے مستقل مندوب منیر اکرم نے سلامتی کونسل کے صدرگیبون کے سفارت کار مائیکل بیانگ سے ملاقات کی اور وزیر خارجہ بلاول بھٹو زرداری کاخط ان کے حوالے کیاجس میں انہوں نے مقبوضہ کشمیر کی خطرناک صورتحال بارے آگاہ کیا ہے۔کشمیرمیڈیاسروس کے مطابق اقوام متحدہ میں پاکستان کے مشن کی طرف سے جاری بیان میں کہاگیا ہے کہ اپنے خط میں بلاول بھٹو زرداری نے سلامتی کونسل کے صدر گیبون اور اقوام متحدہ کے جنرل سیکرٹری انتونیو گو تریس پر زور دیا ہے کہ وہ جموں وکشمیر کے مسئلے کا سلامتی کونسل کی قراردادوں اور کشمیری عوام کی امنگوں کے مطابق حل کرانے کیلئے ٹھوس اقدامات کریں۔پاکستانی مندوب نے اس سے قبل جنرل اسمبلی کی سپیشل پولیٹکل اینڈ ڈی کالونائزیشن (فورتھ)کمیٹی کے اجلاس سے خطاب میں جموں و کشمیر پر بھارت کے غیر قانونی تسلط کو جدید دور کے نوآبادیاتی نظام کا بدترین مظہر قرار دیتے ہوئے دہائیوں سے حل طلب اس تنازعے کو حل کرنے کی ضرورت پر زور دیا۔انہوں نے کہا کہ 1946کے بعد سے اب تک80سابق نوآبادیاں آزادی حاصل کر چکی ہیں لیکن کچھ لوگوں کو اب بھی حق خود ارادیت دینے سے انکار کیا جا رہا ہے اور بھارت کے غیر قانونی زیر تسلط جموں و کشمیر اور فلسطین اس کی نمایاں مثالیں ہیں۔