امریکہ اثاثے بحالی کے وعدے کی مسلسل خلاف ورزی کر رہاہے،طالبان قیادت

کراچی (جنگ نیوز) طالبان قیادت نے امریکی عہدیداروں پر واضح کیا ہے کہ امریکہ اثاثے بحالی کے وعدے کی مسلسل خلاف ورزی کر رہاہے،ایک سال گزرنے کےباوجود کوئی پیش رفت نہیں کی گئی، ا فوری اثاثے بحال کئے جائیں ۔ تفصیلات کے مطابق طالبان دوحہ کے سینئر رہنمائوں نے گزشتہ روز اہم امریکی عہداروں کو ملاقات میں بتایا کہ امریکہ مسلسل وعدہ خلافی کررہاہے۔ افغانستان کےیورپی خصوصاً امریکی بنکوں میں رکھے گئے کروڑوں ڈالر موجود ہیں،امریکہ نے انہیں واپس کرنے کی یقین دہانی کرائی تھی لیکن ایک سال سے زائد عرصے کےبعد بھی امریکہ نے اس حوالے سے کوئی پیش رفت نہیں کی ہے۔ طالبان قیادت کاکہنا ہےکہ اگرہمارے اثاثے بحال کردیئے جائیں تو ہمیں کسی کے آگے ہاتھ پھیلانے کی ضرورت نہیں ہو گی۔ کہا جا رہاہے کہ امریکہ افغان اثاثوں پرطالبان سے سیاست کررہاہے ۔ طالبان کی دوحہ قیادت کاکہنا ہے کہ افغان بزنس کمیونٹی کے بھی اثاثے بھی برطانیہ اور امریکہ میں ضبط کیے گئے ہیں جبکہ بزنس کمیونٹی کا افغان حکمرانوں سے کوئی لینادینا نہیں ہے، امریکہ جان بوجھ کرافغان بزنس کمیونٹی کو بلیک میل کررہاہے۔ طالبان نے کہا ہے کہ امریکہ افغان اثاثوں کو فوری طو ر پر بحال کرے جو افغان عوام کا حق ہے۔ کہا جا رہاہے کہ باہر کے ملکوں میں افغان عوام اور حکمرانوں کی اتنی دولت ہے ،جس سے افغانستان کی معیشت بہتر ہوسکتی ہے۔