خاران: مسجد میں دوران نماز فائرنگ، سابق چیف جسٹس محمد نور مسکانزئی شہید

خاران/کوئٹہ (نامہ نگار/ خ ن) بلوچستان اور وفاقی شریعت عدالت کے سابق چیف جسٹس محمد نور مسکان زئی فائرنگ سے شہید ہو گئے ، ڈی آئی جی رخشان ڈویژن نزیر احمد کرد کے مطابق سابق چیف جسٹس بلوچستان ہائی کورٹ، اور سابق چیف جسٹس فیڈرل شریعت کورٹ محمد نور مسکان زئی خاران شہر میں اپنی رہائش گاہ کے قریب والی مسجد میں عشاء کی نماز ادا کررہے تھے کہ نامعلوم مسلح افراد نے ان پر فائرنگ کردی جس سے محمد نور مسکان زئی اور ان کے رشتہ دار حاجی ممتاز احمد ایجباڑی زخمی ہوگئے، انھیں ڈسٹرکٹ ہیڈ کوارٹر سول ہسپتال خاران منتقل کیا گیا، جہاں ہسپتال عملے نے انہیں فوری طبی امداد فراہم کی اور انہیں مزید علاج کے لئے کوئٹہ منتقل کیا جا رہا تھا کہ محمد نور مسکان زئی زخموں کی تاب نہ لاتے ہوئے چل بسے، ہسپتال کے ایم ایس ڈاکٹر محبوب بلوچ کے مطابق سابق چیف جسٹس کو چار گولیاں لگی تھیں، سابق چیف جسٹس محمد نور مسکان زئی پر حملے کی خبر سنتے ہی سول وعسکری حکام سمیت مختلف شعبوں سے تعلق رکھنے والے افراد بڑی تعداد میں ہسپتال پہنچ گئے۔