سائفر معاملے پر کئی بار موقف دے چکے، طالبان حکومت فوری تسلیم کرنے کا کوئی منصوبہ زیر غور نہیں، پاکستان

اسلام آباد (نامہ نگار خصوصی) طالبان کی افغان عبوری حکومت فوری طور پر تسلیم کرنے کا کوئی منصوبہ زیر غور نہیں، پاکستان اور عالمی برادری اس سلسلے میں مشاورت کر رہے ہیں۔ افغان حکومت تسلیم کرنا ایک اہم سنجیدہ مسئلہ ہے۔یہ بات وزارت خارجہ کے ترجمان عاصم افتخار نے جمعہ کو اپنی ہفتہ وار پریس بریفنگ کے دوران کہی۔ انہوں نے بتایا کہ سائفر کے معاملے پر جامع وضاحت دے چکے ہیں پاکستان نے ہمیشہ عالمی اور علاقائی امن کی بات کی اور مثبت انداز میں تمام ممالک کے ساتھ آگے بڑھ رہا ہے۔ بیرون ملک دوروں پر وزراء کے ساتھ تضحیک آمیز رویے کا سوال ہوا تو ترجمان دفتر خارجہ نے کہا کہ ایسے واقعات پر نوٹس ليتے ہيں۔ امریکی حکام نے بھی وزیر خزانہ کے ساتھ پیش آنے والے واقعے پر نوٹس لیا۔ دفتر خارجہ نے کشمیری حریت رہنما الطاف احمد شاہ کے بھارت کی حراست میں بدترین حالات میں انتقال پر شدید افسوس کا اظہار کیا، وہ گزشتہ 5 برس سے بھارت کی بدنام جیل تہاڑ میں قید تھے۔ انہوں نے کہا کہ بھارتی ناظم الامور کو اسلام آباد میں دفتر خارجہ میں طلب کرکے حریت رہنما الطاف احمد شاہ کی ہلاکت پر شدید احتجاج ریکارڈ کیا گیا ہے۔